Македонија не искористи четири големи шанси и претрпе нов пораз од Украина

Македонската фудбалска репрезентација мораше да се помири со нов неповолен епилог против селекцијата на Украина, иако уште еднаш покажа дека може да парира и на моменти да биде многу подобар тим од денешниот ривал. Поради воената состојба во Украина, натперварот се играше во Прага пред половично исполнет стадион, а на крајот славеше домаќинот на хартија и покрај доброто светло во кое се прикажаа избраниците на Благоја Милевски. Македонија дефинитивно има за што да жали на оваа пресметка, бидејќи откако прими несреќен гол за 1:0, целосно ја презема иницијативата и создаде четири стопроцентни шанси за гол. Украина поведе по грешката која ја направи Атанасов и ударот на Судаков кој од Серафимов заврши во мрежата, но до крајот на првиот дел, Македонија имаше две супер шанси преку Миовски и Ашковски. Двата удари беа неутрализирани од Турбин, кој при резултат 0:0 му одбрани уште еден удар на напаѓачот на Абердин кој учествуваше во сите три опасни акции на нашиот тим. Миовски немаше среќа да се запише во листата на стрелците, а истото важи и за Чурлинов кој влезе на стартот на вториот дел и кој ја имаше нашата најголема шанса во овој дел од мечот. Фудбалерот на Барнли шутираше какошто треба, но Турбин со многу среќа интервенираше по четврти пат и одново ја сочува својата мрежа. Во продолжение, Украина беше тимот кој ги контролираше случувањата на теренот и на двапати ја погоди гредата преку Матвиенко и Судаков, а иако во меѓувреме неколку добри реакции имаше и Димитриевски, Македонија на крајот сепак прими и втор гол. Нашите фрлија се на една карта во судиското продолжение, по што дозволија контра за домаќинот по која Караваев го изненади Столе од огромна далечина.