Липи: Манчини погреши само против Македонија

Марчело Липи беше селектор кога Италија последен пат победи на Светско првенство, но тоа беше и последен пат „азурите“ да ја поминат барем групата.

На следните два мундијали тоа не им успеа на Италијанците, за да следуваат првенствата во 2018 и 2022 година на кои не обезбедија ниту пласман на завршниот турнир.

Во анализата на големиот неуспех и поразот од Македонија, Липи смета дека имало нешто што не функционирало, но тоа не значи дека Роберто Манчини не требало да остане на клупата.

– Не би зборувал за некоја криза во италијанскиот фудбал, се работи само за лош момент.

– Ние сме европски шампиони и оваа селекција немаше пораз долго време. Не смееме да заборавиме дека 65 проценти од репрезентативците во мое време играа во Серија А, а сега се двојно помалку. Нема веќе играчи како Дел Пјеро, Тоти и Монтела.

– Манчини заврши одлична работа, освен на дуелот со Македонија. Мислам дека е исправна одлуката да остане на клупата и во иднина. Сепак, ако не можеш да ја победиш Македонија, тогаш чашата е полупразна, – изјавил Липи.