Легенда на Јунајтед со шокантен трансфер предлог: Тен Хаг треба да го врати на „Олд Трафорд“

Двајт Јорк е клупска легенда на Манчестер Јунајтед и член на генерацијата која стана европски првак пред повеќе од две децении, а сега ги шокираше фановите со трансфер предлогот упатен до менаџерот Ерик тен Хаг.

Јорк смета дека во ситуација кога Јунајтед се уште има буџет за трошење, треба да се искористи шансата и во тимот да биде вратен Ромелу Лукаку.

Белгиецот се уште е во потрага по нов клуб, бидејќи нема иднина во Челси, а Јорк е убеден дека Јунајтед би била идеална дестинација за него.

– Лукаку се уште е доволно добар играч за да настапува за некој од Топ 6 тимовите во Англија.

– Мислам дека Јунајтед може да го доведе на заем и да му плаќа одреден процент од големата плата. Што и да зборуваат луѓето за Лукаку, тој има импресивен број на постигнати голови и не ги добива заслугите кои ги заслужува.

– Ако успеете да го „запалите“, тој може да решава натпревари и да биде голем проблем за било кој европски клуб. Знам дека Јунајтед го доведе Хојлунд, но Лукаку може да биде бонус, со него имате гаранција за 15-20 голови по сезона, – вели Јорк.

Лукаку беше член на Јунајтед меѓу 2017 и 2019 година.