Леао откри кои се целите на Милан во новата сезона

Рафаел Леао се реши да ги одбие сите понуди и потпише нов договор со италијанскиот великан Милан, а на тој начин да стави крај на дилемите, прашањата кои се појавуваа во јавноста.

Португалецот сега се очекува да ја потврди улогата на лидер, најдобар играч на „росонерите“.

-Акт на љубов. Одлуката веќе ми беше во главата, многу размислував за тоа, прашање беше само тајминг, избор на вистинскиот момент. Пред договорот сакав да одам во финалето на Лигата на шампионите, но не успеавме. Можеби во денешниот фудбал е невозможно да се гледате себеси како го носите истиот дрес цел живот. Потпишав на пет години, тоа значи дека сакам да бидам тука. Проектот е многу важен, има многу млади играчи, а најважно е што можам да пораснам овде за да ја постигнам мојата цел: многу да победувам, -истакна Леао кој говореше за целите на „црвено-црните“ во натпреварувачката 2023/2024.

-Мора да освоиме трофеј. Мора да тренираме и да разбереме што сака тренерот за да имаме одлична сезона како тим. Според она што го видов со Реал Мадрид, имаме многу силен тим. Сонот за Скудетото е остварен, сега недостасува Лигата на шампионите, трофејот што сите играчи сакаат да го освојат.

-Во Италија пак е тешко да се триумфира бидејќи има толку многу силни тимови и во 38 натпревари никогаш не можете да испуштите бодови. Европските купови во последната година покажаа дека Серија А е силна лига, -порача напаѓачот кој во оваа сезона ќе го носи дресот со број десет.