Лампард со совет до Тод Боли: Ќе освоев повеќе титули ако не се менуваа често тренерите!

Френк Лампард ја заврши својата играчка кариера како најдобар голгетер меѓу играчите за врска кои некогаш заиграле во Премиер лигата, натреварување кое го освои во три наврати како лидер во играта на Челси.

По завршувањето на играчката кариера, Френк се префрли во тренерските води и сега по вторпат го води тимот, но јасно е дека нема да биде за долго со оглед на тоа што е привремено решение.

Челси е во потрага на долгорочно решение и во јавноста се споменуваат повеќе имиња, а Френк како привремен предводник испрати совет до газдата Тод Боли и му порача да не избрзува.

– Дали Челси треба да почека пред да го најде вистинскиот тренер? Апсолутно, мора да се направи добар избор и да не се избрзува. Сега сме во фаза од сезоната кога ни е јасно дека нема да играме во Европа и најдобро е да се почека крајот.

– Јас бев дел од Челси како играч и знам како функционира ова. Освоив три титули, но требаше да освојам пет или шест, имам такво чувство. Честото менување на тренери не е добро, ќе освоевме повеќе ако бевме доследни и одевме во еден правец. Сметам дека така треба да биде и сега, – вели Лампард.