Кјелини заминува во пензија по мечот со Аргентина

ФУДБАЛ – ФИНАЛИСИМА УТРЕ НА „ВЕМБЛИ“

Откако се збогуваше со својот клуб во мај, Џорџо Кјелини се подготвува утре да го одигра својот 117-ти и последен интернационален фудбалски меч кога европскиот првак Италија ќе се сретне со јужноамериканскиот шампион Аргентина, на инаугуративниот меч финалисима на стадионот „Вембли“ во Лондон. Централниот дефанзивец го достигна фудбалскиот врв лани, кога ги предводеше „азурите“ до триумф во финалето на Европското првенство, а сега зборува во интервјуто за интернет-страницата на Европската фудбалска унија. За пензионирањето од меѓународниот фудбал во финалисима: Убаво е. Аргентина има исклучителни играчи. Очигледно е дека првиот што ви паѓа на ум е Лионел Меси, но другите околу него се фантастични, тие не ја освоија Копа Америка случајно. Меси е фудбалска икона. Не е мое да кажам дали е најдобар на сите времиња. Ќе ми биде само задоволство да го одиграм мојот последен натпревар за репрезентацијата против него. Имав среќа да се соочам со него во неколку наврати и, за среќа, често ми оди добро. Борбата со големите играчи како него се сведува на среќа: ако тој и неговиот тим го имаат вистинскиот ден, тие се незапирливи. За неговата кариера во Италија: Беше, без сомнение, подобро отколку што можев да замислам. Кога си дете, сонуваш да играш за репрезентацијата, затоа што тоа е врвот. Помислата да можам да одиграм повеќе од 100 меча во текот на 18 години, да бидам капитен и да кренам важен пехар како што направив минатата година на „Вембли“ беше шлагот на тортата. Се надевам дека ќе ме паметат како добра личност. Личност што персонифицирала одредени вредности. На теренот имам свои силни и слаби страни, а некои ќе ги паметат и двете. На долг рок, секогаш ќе се сеќавате на поубавите работи, тоа е нормално. За тоа како ќе се чувствува со полно работно време: Само што го доживеав тоа со Јувентус, па горе-долу знам што да очекувам. Тоа беа двете љубови на мојот живот, две големи љубовни приказни. Играв за Јувентус 17 години и 18 години за репрезентацијата, тие беа голем дел од мојот живот. Се чувствувам среќен со постигнатото и малку горд за она што го постигнав во кариерата. Но повеќе од тоа, горд сум на основните вредности што ги пренесов и на наклонетоста што луѓето што ги запознав досега ја имаат кон мене.