Кралот Чарлс му напиша приватно писмо на Доналд Трамп, Бакингем не ја открива содржината

15.07.2024 juli Ponedelnik

Британскиот крал Чарлс Трети напиша приватно писмо до Доналд Трамп, вели Бакингемската палата.

Монархот (75) се обрати до поранешниот претседател откога тој преживеа обид за атентат на предизборен митинг во Пенсилванија во саботата, објави „Њузвик“.

Помошниците не го споделуваат текстот на писмото на кралот, но велат дека е во согласност со коментарите на британскиот премиер Кеир Стармер. Писмото е испорачано преку Амбасадата на Британија во Вашингтон.

Стармер напиша на X, поранешен „Твитер“: „Згрозен сум од шокантните сцени на митингот на претседателот Трамп и му ги испраќаме нему и на неговото семејство нашите најдобри желби. Политичкото насилство, во каква било форма, нема место во нашите општества и моите мисли се со сите жртви на овој напад“.

Не е невообичаено британскиот монарх, било Чарлс или кралицата Елизабета II за време на нејзиниот живот, да испраќа писма за поддршка во време на национална криза или катастрофа, сепак, палатата во повеќето случаи го објавува текстот на писмото.