„Кралевите“ имаат фаворит: Реал сака да го замени Зидан со проверен тренер

01.06.2021 Juni Vtornik

Реал Мадрид треба да реши доста прашања кога станува збор за наредната сезона, а најважното дефинитивно е кој ќе биде нов тренер, наследникот на Зинедин Зидан кој одлучи да ја напушти функцијата по лошата кампања во која клубот не освои ниту еден трофеј.

Во јавноста се споменуваа неколку имиња како Маурусио Покетино, Антонио Конте, легендата на клубот Раул Гонзалес кој сега ја води втората екипа, но според шпанските медиуми еден друг стратег сега е фаворит-тоа е Карло Анчелоти.

Наводно шпанскиот великан веќе остварил контакт со Анчелоти кој во моментов е под договор со премиерлигашот Евертон.

Договорот му истекува во 2024 година што значи дека Реал прво ќе мора да се разбере со „карамелите“ за да потоа ја заврши работата и со Италијанецот кој беше на „Сантијаго Бернабеу“ од 2013 до 2015 година, период во кој тој во Мадрид ја донесе јубилејната десетта титула во ЛШ.