Кошаркарска вртелешка: Јокиќ го избезуми центарот на Детроит

По четири порази во низа, Денвер беше приморан да реагира и да го покаже своето најдобро лице на гостувањето во Детроит, нешто што беше резервирано за клучниот дел од натпреварот.

Пистонси беа рамноправен противник и водеа пет разлика до стартот на последната четвртина, во која потоа следеше распад и комплетна доминација на Нагетси.

Лидерот на Западот ја запиша 47-та победа оваа сезона со резултат 100:119, а одлучувачко за тоа беше триумфот во последната четвртина со убедливи 33:13.

Никола Јокиќ повторно беше на висина на задачата и само една асистенција го делеше од нов трипл-дабл, па така мечот го заврши со 30 поени, 10 скокови и 9 асистенции.

Како и по обичај, Србинот постигнуваше поени и ги разигруваше своите соиграчи, но изведе и една кошаркарска вртелешка која беше посебно атрактивна, а во која негова жртва беше центарот на Детроит, Џејмс Вајсман.