Кореча: Ако Надал и Федерер го имаа рекордот на Ѓоковиќ…

29.03.2022 Mart Vtornik

Прославениот шпански тенисер и некогашен светски рекет број еден, Алекс Кореча смета дека Новак Ѓоковиќ заслужува поголема почит за се што има постигнато во досегашната кариера.

Кореча кој доста е активен и редовно ги коментира сите случувања во белиот спорт верува дека Рафаел Надал и Рожер Федерер добиваат поинаков третман од Новак Ѓоковиќ кој води битка со нив за признанието најдобар на сите времиња.

-Има една работа со Новак која според мене нема да се надмине уште многу, многу долго. Сега 363 недели како светски број еден. И овој рекорд помина целосно незабележан. Тоа е неправедно. Затоа што ако тој рекорд го држеше Надал или Федерер, трајно ќе беше истакнат како нешто недостижно и ненадминато, -вели Шпанецот за кого Ѓоковиќ во моментов е посилен од било кога по сите работи, неправди кои му се случија во изминативе години.

-Мислам дека денеска со сето она што му се случи во последните години од Отвореното првенство на САД 2020 година, финалето кое го загуби лани, оваа година во Австралија… – тој е посилен од било кога! Длабоко му се восхитувам, бидејќи го кажува она што го чувствува. Тој не ги кажува вистинските работи за да ги натера луѓето да го сакаат. Можете повеќе или помалку да се согласите со неговиот начин на размислување, но не можете да го критикувате фактот дека е доследен на неговите принципи, -рече Кореча кој на крајот даде коментар за дебата за „ГОАТ“.

-За мене многу значи бројот на освоени грен слемови во таа трка, но мора да се бројат неделите поминати на врвот на АТП листата, но и завршниот Мастерс. Меѓусебниот скор не ни кажува многу, -заврши шпанската легенда.