Концерт на Пламенка Трајковска – гудачко трио во Крива Паланка

Пламенка Трајковска – гудачко трио ќе настапи на 8 јуни во 19 часот во киносалата на Центарот за култура во Крива Паланка.

На програмата се композиции во модерен класичен стил. На концертот покрај Трајковска ќе настапат и Наташа Диденко, на виолина и Љубица Бошкоска, на виола.

Пламенка Трајковска својата музичка активност ја заснова на идејата дека класичната музика треба да е широко достапна до општата публика. Таа настапува на речиси сите сцени и фестивали во Македонија како и на концерти во Србија, Грција, Хрватска, Франција и Танзанија. Последните години работи на полето на доближување на класичната музика до децата. Автор и изведувач е на албумот „Апасионато“, на албумот „Карневал на животните“ од Камиј Сен Санс во адаптација за виолина и пијано и на повеќе синглови. Неодамна го реализираше проектот „Ехо“ за кој изработи и сними композиции со автентични природни звуци од Кањонот Матка.