Концерт на АКУД „Мирче Ацев“ – Скопје во Дом на АРМ

21.05.2024 Maj Vtornik

Академското културно-уметничко друштво „Мирче Ацев“ – Скопје, утревечер во Домот на Армијата ќе одржи концерт по повод Денот на сесловенските просветители. На концертот ќе настапат фолклорниот и хорскиот ансамбл на друштвото, како и народниот оркестар.

-Оваа јубилејна 75 концертна сезона не е само прослава на нашето друштво, туку и ваша. Прослава на секој еден кој го поддржал АКУД „Мирче Ацев“ – Скопје, којшто ја разбрал неговата голема и значајна мисија. Со самото формирање на првите факултети во Република Македонија, веднаш по ослободувањето, а со тоа и со почетоците на нивниот развој и општествен подем, на површина се појавува и потребата на студентите за поорганизиран културно-забавен живот. Потреба од нешто, што ќе биде носител на културата и уметноста во средиштето на сите активности што се јавуваат како израз на интелектуалните стремежи и прогресот, велат од АКУД „Мирче Ацев“.

Олицетворение на таков носител во областа на уметноста и културата, уште во самиот зародиш на универзитетскиот живот, станува Академското културно-уметничко друштво „Мирче Ацев“, кое во целиот изминат период е единственото културно-уметничко друштво на ниво на целата држава со предзнакот академско.