„Книга за Чинго“ на авторите Пандев и Димоски

Во издание на општина Охрид од печат излезе „Книга за Чинго“ , што ја приредија Димитар Пандев и Славе Ѓорѓо Димоски.

Во ова капитално дело на 357 страници поместени се бројни прилози на еминентни имиња, научни трудови, есеи, записи, спомени, осврти и други жанрови низ кои се претставуваат вредностите на делата на Живко Чинго, еден од бардовите на современата македонска литература.

„Сметам, за секогаш ќе остане сиромав оној писател што ќе замиже пред сегашноста, но најголема казна ќе падне врз лицето на најталентираните автори ако рамнодушно се однесат кон своето време. Се разбира, многубројни се дилемите, работата претешка, неблагодарна, – но искрениот творец никогаш не калкулирал, тој мора да биде на прва линија“, ќе рече Чинго запрашан како во неговото творештво влијаат моралните и творечките дилеми на сегашноста и минатото.

Најновото издание на Општина Охрид „Книга за Чинго“ ќе биде промовирано на годинашната културна манифестација „Вечер на Чинго“ што во чест на големиот македонски раскажувач се одржува на неговиот роденден 13 август во родното село Велгошти.