Книга: „Антропологија и сто други раскази“ – составени од 101 збор

Збирката „Антропологија и сто други раскази“ на Ден Роудс содржи 101 расказ, секој составен од 101 збор.

Формалното правило секој расказ да има 101 збор (ова правило е задржано и во преводот на македонски јазик) на книгата ѝ обезбедува хомогеност на стилски многу прецизно изведено дело. Лесни за читање, забавни, сепак обоени со длабока тага поради минливоста на нештата, овие микрораскази со трагикомична иронија и горчлив хумор прикажуваат низа варијанти во кои може да се оствари љубовта. Роудс најчесто се интересира за крајните точки меѓу кои може да осцилираат емоциите на човекот: параноидни фантазии што стануваат реалност, мазохистичка вљубеност во другиот, сурова нетрпеливост кон партнерот, невообичаено голема посветеност што преминува во понижување, претерана наивност и доверба… Ваквата мрачна визија за меѓусебните односи станува интересна за читање поради способноста на авторот преку корозивната смисла за хумор да ја релативизира секоја од раскажаните ситуации.