Клоп со порака до големиот ривал: Ќе продолжиме да го бркаме Сити како луди

Ливерпул со пресврт дојде до трите бода на „Вила Парк“ со што се израмни со Манчестер Сити на врвот на табелата во Премиер лигата.

Сега двата состави имаат по 86 бода со тоа што треба да се напомене дека „граѓаните“ допрва треба да го одиграа својот натпревар против Вулверхемптон кој е закажан за вечерва од 21:15 часот. Менаџерот Јирген Клоп е среќен и задоволен од победата над Астон Вила, а притоа ја искористи приликата да испрати една порака до „граѓаните“.

-Покажавме масивен, исклучителен, неверојатен менталитет. Мане постигна одличен гол, навистина импресивен. И тогаш моравме да стиснеме заби и да се бориме. Доколку моите играчи не беа толку добри како што се, веројатно ќе зборувавме за сосема поинаков резултат. Нивната класа, менталитет и карактер се причината поради која сме таму каде што сме. Не сум изненаден што успеаа да стигнат до победата, но тоа не го земам здраво за готово. Навистина сум горд на нив, тоа беше голем успех.

-Ќе продолжиме да го бркаме Сити како луди. Нема потреба да се троши енергија и да се надеваме дека губат. Не, само треба да размислуваме како да победиме, а тоа не се промени. Сега треба брзо да се опоравиме за нашиот следен натпревар. Никој нема да не се смилува, -порача Германецот кој сега треба да го спреми тимот за финалето на ФА Купот против Челси.