Кина тестираше сателити што му конкурираат на Старлинк

Истражувачите од компанијата „Галакси спејс“, кинески производител на сателити, како и неколку други научноистражувачки институции, учествуваа во првото тестирање на отворено море на кинеската сателитска констелација во ниската орбита (LEO).

И покрај тоа што Кина прави скокови и напредок на различни технолошки полиња, од хиперсонично оружје до вештачка интелигенција, кинескиот сателитски оператор Сатком не успеа да направи глобален пробив. Фокусиран на локалните потреби, Сатком се потпира на сателити во геостационарните орбити, но во обидот да се прошири на глобално ниво, сега се движи кон ниската орбита на Земјата, која би можела да се натпреварува со услуги како Старлинк на „Спејс екс“.

Кина има цел да воспостави констелација од 13.000 сателити во ниската орбита на Земјата, која може да се користи за давање интернет-услуги во земји каде што може да ја потврди својата доминација и да ги наруши плановите на меѓународните сателитски оператори. Планот е да се користат ракетата „Лонг Марч-5Б“ и технологијата за погон на втората фаза Јуанџенг-2 за лансирање сателити во ниска орбита. Во моментов Кина ја користи ракетата „Лонг Марч-2Ц“ за своите лансирања, вклучувајќи го и минатогодишното. Проектот е предводен од Кинеската академија за вселенска технологија (CAST) и Академијата за иновации за микросателити (IAMCAS), агенција под покровителство на Кинеската академија на науките. На ИАМЦАС му беше доделена целта да лансира 30 сателити до крајот на годината, а ќе биде помогнат од компании како „Галакси спејс“, кои претходно лансираа сателити во ниската Земјина орбита.

Во март 2022 година, „Галакси спејс“ лансира шест сателити од центарот Ксичанг, заедно со комуникациски сателит доставен во ниската орбита, за да ја формираат првата кинеска констелација за тестирање на комуникација ЛЕО. Сателитот тежи околу 198 килограми, а заедно со другите помали сателити формира мало соѕвездие наречено мини-пајак. Соѕвездието е изградено за да обезбеди непрекинати сателитски широкопојасни комуникации во ниската орбита за период малку подолг од 30 минути. Ваквата услуга Кина ќе ја користи како експериментална платформа за воспоставување сателитски интернет.