Капело со подетална анализа: Не останавме без мундијал поради поразот од Македонија

29.03.2022 Mart Vtornik

Фабио Капело веќе направи првична анализа на елиминацијата која ја доживеа Италија од Македонија, но денеска во обраќањето за „Газета“ се обиде да го посочи клучот за големиот неуспех, кој според него не се крие во бараж полуфиналето.

Легендарниот италијански стручњак нагласи дека Роберто Манчини ја направил истата грешка како и секој тренер, односно продолжил слепо да им верува на играчите кои направија голем успех на Европското првенство, но кои според него не се во најдобра форма за стартна постава.

Капело се врати неколку меча наназад и потенцира деак двата промашени пенали на Жоржињо се одлучувачки за ваквиот конечен епилог, до кој и не требало да дојде. Ѕвездата на Челси најпрво не реализираше пенал за победа на гостувањето во Швајцарија, а потоа и на домашен терен во 90-та минута.

– Ќе кажам дека нема да играме на Светското првенство поради два промашени пенали, а не поради поразот од Македонија. Го освоивме Европското првенство такашто бевме подобри од ривалите во два пенал рулети, но за време на крајот од квалификациите за Светското првенство, воочив дека тимот го нема истиот дух.

– На крајот, Манчини им веруваше на оние кои беа главни играчи на Европското првенство, но ја направи истата грешка како и секој тренер. Сепак, и покрај тоа, се надевам дека ќе продолжи како досега, верувам во неговата работа и покрај ова, – потенцира Дон Фабио.