Иско веќе има договор со друг клуб во кој ќе добие рекордна плата

Разделбата на Иско и Реал Мадрид е реално сценарио кое веројатно ќе биде реализирано летово, а шпански „АС“тврди дека фудбалерот веќе има план за следната дестинација.

Според овој извор, Иско има договор со Бетис за трансфер ова лето, при што составот од Севилја би го добил играчот за врска без отштета.

Приоритет за Бетис во моментов е да обезбеди место во Лигата на шампионите, а потоа тренерот Мануел Пелегрини по секоја цена ќе сака да соработува со Иско, кој би бил големо засилување за новиот освојувач на шпанскиот куп.

„АС“ тврди дека Иско ќе добие двегодишен договор, со кој ќе заработи над 20 милиони евра, со што ќе стане нов рекордер во редовите на Бетис, а ќе може да го продолжи договорот за дополнителна сезона.

Иско ќе добие и бонус за потпишувањето на договорот, но покрај пласманот во ЛШ, на Бетис ќе му биде потребна и продажба на еден од своите поквалитетни играчи, трансфер кој ќе го „спонзорира“ ангажирањето на фудбалерот на Реал Мадрид.