Изложбата „Светите новомаченици од Јасеновац во светлината на воскресението“ во Музејот на македонск

Изложбата „Светите новомаченици од Јасеновац во светлината на воскресението“ во Музејот на македонската борба Гостувачката изложба „Светите новомаченици од Јасеновац во светлината на воскресението“ на Музејот на жртвите на геноцидот од Белград, Република Србија, ќе биде отворена денес, четврток, со почеток во 13 часот, во НУ Музеј на македонската борба за самостојност. Изложбата се состои од дела на монахињата Марија (Антиќ), член на сестринството на манастирот „Раѓање на свети Јован Крстител“ (Јасеновац, Хрватска), дел од Српската православна епархија Пакрац – Славонија, кои се инспирирани од вистинските и трагични настани што се случиле во Јасеновац за време на Втората светска војна. Изложените дела на авторката, која е калуѓерка, а не обучен визуелен уметник, се базирани на иконографските традиции и измешани со наивното, но содржат и суптилна врска со реалистичкото сакрално сликарство на Христијанската православна црква и најдобрите традиции на школата за иконопис. Изложбата се организира како резултат на потпишаниот протокол за соработка меѓу Музејот на жртвите на геноцидот од Белград, Република Србија, и Музејот на македонската борба за самостојност. Македонската публика ќе има можност да ја види изложбата од 16 ноември до 15 декември 2023.