Изложба на Ѓорѓе Јовановиќ во МСУ: „Горчлив шеќер“ – трагикомична приказна за хаотичната современост

Изложбата што предизвика голем интерес во јавноста, претставува проект составен од два дела, просторна инсталација и анимации и видеа, осмислени како фрагменти од актуелната стварност и современиот живот. Тие во себе содржат знаци, состојби и ситуации, кои истовремено функционираат во преиспитувањето на локалниот контекст, но овозможуваат и исчитување на влијанијата и на меѓузависноста во глобалните текови

„Во духот на Лотреамон, би можел да кажам дека ‘Горчлив шеќер’ е приказна за случајната средба на Калимеро, една запалка и Доналд Трамп на операционата маса, па оттаму, користејќи го искуството на надреализмот и дадаизмот, но сега ставени во нашиот современ, хаотичен контекст, сакав да креирам дела и простори што нема да илустрираат или да дефинираат одредени појави, туку повеќе ќе предизвикуваат прашања и критичко промислување на светот во кој живееме денес“, ја објаснува македонскиот уметник Ѓорѓе Јовановиќ својата најнова изложба насловена „Горчлив шеќер“, која завчеравечер беше отворена во Музејот на современа уметност во Скопје, каде што ќе може да се посети до 10 февруари.

Тој додава дека му било важно отвoрањето теми што не се толку често третирани на нашата современа ликовна сцена, како и создавањето простор за соработка на различни уметнички дисциплини и пробивањето на острите или воспоставени рамки на уметничка креација и продукција.

Изложбата што предизвика голем интерес во јавноста, претставува проект составен од два дела, просторна инсталација и анимации и видеа, осмислени како фрагменти од актуелната стварност и современиот живот. Тие во себе содржат знаци, состојби и ситуации, кои истовремено функционираат во преиспитувањето на локалниот контекст, но овозможуваат и исчитување на влијанијата и на меѓузависноста во глобалните текови.

„Проектот претставува синтеза и надградување на искуствата на историската авангарда, особено на дадаистичките и надреалистичките интервенции, во обид да ги трансформира и употреби во современиот контекст, обременет со предизвиците на (пост)пандемската политичка и технолошка реалност. Преплетувањето на реалното и надреалното и екстремните точки на нивното среќавање се одразува и преку спојувањето на разните жанрови. Во просторната инсталација, која ја сочинуваат огромен број слики и објекти, како и анимациите што ја активираат, Јовановиќ создава повеќедимензионална наративна мрежа низ која бројните протагонисти и различните состојби во кои се наоѓаат, се трансформираат на едно друго ниво, како тотална слика за хаотичната современоста“, велат кураторите Владимир Јанчевски и Благоја Варошанец.

Анимираните видеа се колекција од поетични, хумористични и трагикомични приказни работени според раскази од неколкумина претставници на поновата генерација македонски писатели (Румена Бужаровска, Петар Андоновски, Алекс Букарски…) како и идеи на Јовановиќ. Во нивниот фокус се неизвесноста, игноранцијата, преку лични приказни, трагедии и неволји на луѓето на маргините и преку прикажување на екстреми на човековото однесување во борбата и разбивањeто на стереотипите во патријархалното општество и потрагата по правда и слобода.

Проектот се реализира со финансиска поддршка од Министерството за култура и од Центарот за истражување и информирање за животната средина „Екосвест“.

Фото: Маја Јаневска-Илиева