Изложба на фотографии на Кушевска и Филиповиќ утре во галеријата Рудиќ

Заедничката изложба на фотографии на Ема Кушевска и Михајло Филиповиќ – Фил, на тема „Над вода – под вода”, ќе биде отворена во галеријата Рудиќ утре во 20 часот.

Љубовта кон природата и фотографијата, особено кон водите, ги поттикна да избегаат од градот и веќе 12 години живеат на струшкото крајбрежје, крај езерото кое е вечна инспирација за секој уметник.

На овој навидум мал простор, тие секојдневно пронаоѓаат нови мотиви, го запознаваат богатството на ендемската флора и фауна, ги откриваат убавините на четирите годишни времиња, а лете подводниот свет на нашето прекрасно Охридско Езеро. Денот е прекраток, како што велат, да се регистрираат и овековечат сите случувања на малото по површина, но големо пространство со своите чудесии, од изгрејсонце, до зајдисонце.

Фил, роден во Хрватска, професионален фотограф и нуркач, ги замени солените јадрански води со слатката охридска и на оваа изложба ни’ го пренесува подводниот свет на тишината.

Ема, родена во Скопје, чија прва љубов е сликарството, овие 12 години својот уметнички порив го изразува преку објективот на својата камера. Иако и таа обожува подводна фотографија, на оваа изложба ќе се претстави со надводниот свет, онака, како таа го доживува.

Ова е само мал дел од нивното творештво, во надеж дека во иднина повторно ќе имаат можност на јавноста да ѝ ги претстават своите дела.

Изложбата ќе трае до 8 октомври.