Изложба на акварели „Големата Мајка“ на Лазар Дојчинов

Изложбата насловена „Големата Мајка“ на кавадаречкиот ликововен уметник Лазар Дојчинов“, која ќе биде отворена вечерва во 19.30 часот во галеријата на домот на културата во Кавадарци, е посветена на месецот на пролетта – март.

Ќе бидат изложени исклучиво акварели најчесто со пролетни и цветни мотиви и пејсази инспирирани од топлото тиквешко поднебје. Она што е ново како мотив во делата на Дојчинов секако е неолитскиот култен предмет од керамика обликуван во вид на божица – куќа познат како „Големата Мајка“ по кој е и насловена вечерашнава изложба.

Моќниот симбол на божество познат како Мајката – Земја која ги раѓа и контролира водата и сонцето, билките и животните, па дури и самиот човек. Таа повторно ќе го оживее и ќе го породи покојникот, откако во позиција на фетус, ќе биде погребан во нејзините недра. Самата куќа исто така била претставувана со ликот на оваа божица каде долниот дел од женската фигура е претставен во вид на макета на куќа.

Заедно со други заоблени керамички производи за храна кои исто така ја симболизираа плодородната утроба божицата Мајка е централен мотив во делата на Дојчинов која заедно со разбудената природа и цветните полиња ја слават пролетта и раѓањето на нов живот. На многу акварели доминира и жената но не само во статична позиција туку разиграна и со виолина во рацете, мотиви со зрели плодови и расцветани овошни дрвја. Ми.М.