Изложба за два неолитски света на Слатина – Зелениково и Церје – Говрлево

„Преку планината: или за двата паралелни неолитски света на Слатина – Зелениково и Церје – Говрлево“ е наслов на изложбата која во Музејот на Град Скопје ќе биде отворена на 28 декември. Проектот претставува тематска изложба за сличностите и разликите на материјалната култура од два локалитета, од ист период, лоцирани во непосредна близина.

“Имено, освен огромниот број типични артефакти од македонскиот неолит, откриени и на двата локалитета, во збирките се забележуваат одредени предмети со исти својства, но со различна изведба и различен изглед. Сличностите во материјалната култура ја означуваат припадноста на локалитетите во големиот културен комплекс на Балканскиот неолит, но, во истото време, големите разлики меѓу одредени предмети упатуваат на негување посебни традиции и појава на одредени идентитети, уште пред 7.000 години“, наведуваат организаторите.

Оваа изложба првпат по 35 години ќе ги вклучи неверојатните артефакти од наведените локалитети и ќе ги спореди меѓусебно, при што, како што се наведува, предметите од Слатина – Зелениково досега не биле изложени за јавноста.

Во тој контекст, во рамките на изложбата ќе бидат претставени неколку категории керамички предмети откриени на локалитетите: антропоморфни и зооморфни фигурини, антропоморфни модели на куќи, жртвеници и садови.

За организацијата на изложбата и за посетителите на изложбата, потсетуваат организаторите, важат препораките на Владата за мерките против КОВИД-19.