Играта од второто полувреме е рецепт за дуелот со Холандија

19.06.2021 Juni Sabota

Играта во второто полувреме против Украина во кое Македонија беше офанзивна, го притискаше противникот и создаваше шанси, треба да биде рецепт за последниот дуел од групата фаза на Европското првенство (ЕП), против Холандија во Амстердам, в понеделник, како што смета селекторот Игор Ангеловски.

– Одигравме меч со две различни полувремиња. Во првото полувреме целта беше да влеземе попретпазливо, а она што го видовте во второто полувреме беше план без разлика на резултатот. Во второто полувреме покажавме зошто сме на Европското првенство и дека оваа Македонија има квалитет за европско првенство. А кога навивачите ќе ве испратат со громогласен аплауз нас, ни останува криво што не успеавме да дојдеме до позитивен резултат – кажа Ангеловски на прес-конференцијата по мечот со Украина.

Селекторот истакна дека неговите избраници покажале оти заслужено се на ЕП.

– Победени сме но не и поразени. Моите фудбалери покажаа дека заслужено се на Европското првенство. Им кажав дека и против големата Холандија треба да одиграат како во второто полувреме против Украина – објаснува македонскиот стратег, додавајќи дека македонските фудбалери се навикнуваат на притисокот на ЕП.

Тој се надева дека Македонија ќе се претстави во добро издание и ќе стигне до позитивен резулат во мечот против фаворизираната Холандија во Амстердам.

– Се надевам дека Македонија добро ќе се претстави против Холандија и дека ќе успееме да стигнеме до првите бодови на ЕП – порачува Ангеловски.