Засилување за европскиот вицешампион: Интер ќе ангажира докажан дефанзивец од Премиер лигата

Италијанскиот прволигаш Интер ќе направи промени во играчкиот кадар во овој летен преоден рок со јасна цел составот да остане компетитивен, конкурентен за пехари во натпреварувачката 2023/2024.

Европскиот вицешампион ќе остане без играчи како Милан Шкриниар и Данило Д’Амброзио во дефанзивата, но оперативците на клубот работат и е на добар пат да го доведат искусниот Сезар Аспиликуета од редовите на Челси. Тој повеќе од една деценија е дел од „сините“, тим со кој ги освои сите можно титули, ама дојде време за разделба и најдобар доказ за тоа е што Шпанецот веќе ги договорил сите услови за двегодишна соработка со калчолигашот.

Сега останува само да се раздели со Челси и како слободен агент да премине во новата средина што не би требало да биде проблем затоа што постои голема почит меѓу двете страни, а и дефанзивецот повеќе не е незаменлив, не е во прв план, а во август ќе го прослави и 34 роденден.

Сезар претходно има настапувано уште за Осасуна и Олимпик Марсеј.