Започнува 42. Меѓународен студентски фолклорен фестивал

Во организација на Академското културно-уметничко друштво „Мирче Ацев“ – Скопје, вечерва почнува 42. издание на Меѓународниот студентски фолклорен фестивал. Годинава настанот ќе се одржи на две локации – плоштад „Мајка Тереза“ и плоштад „Млечен ресторан“.

Почетокот на сите концертни вечери е од 20 часот.

На годинешното издание учество ќе земат повеќе земји, меѓу кои Грузија, Хрватска, Албанија, Србија, Турција и Македонија.

Поради настаната пандемија, фестивалот се реализира под посебни протоколи предвидени од Владата.

Идејата за организирање на МСФФ е иницирана од студентите на Универзитетот Св. „Кирил и Методиј“ – Скопје во знак на благодарност кон земјите кои помогнаа во изградбата на разрушеното Скопје по катастрофалниот земјотрес во 1963 година.