За Универзалната сала е формиран тим од страна на Министерството за култура

Поради пречки со проектната документација во јули 2021 година, во работата поврзана со реконструкцијата на Универзалната сала во Скопје е вклучено и Министерството за култура кое формираше тим кој ќе биде надлежен.

“Постапката е во последниот квартал на извршување, а Министерството треба само да го доврши и понатаму да отпочне нова постапка за средување на внатрешноста на самиот објект. Така што, ова е отпочнат проект, само продолжува со својата реализација и во рамки на динамиката која што беше претходно утврдена. Верувам дека навреме ќе биде завршен“, посочи на вчерашната прес -конференција градоначалничката Данела Арсовска.

Министерката за култура, Бисера Костадиновска-Стојчевска,пак, истакна дека кога ќе ја добијат целосната документација и одлука од Град Скопје на неа ќе работи тим, којшто веќе е формиран од Одделот за капитални инвестиции и надворешни соработници.

“Ќе го погледнат проектот и ќе донесат одлука како понатаму да постапиме, односно ќе постапиме согласно динамиката, којашто е утврдена, но тоа не значи дека нема да ги спроведиме сите потребни постапки како Надзор при реконструкцијата и се она друго што опфаќа Универзална сала да биде реконструирана. Во таа помош што Владата ја понуди, односно во таа гаранција за Скопје 2028 не се предвидени средствата за реконструкција за Универзална сала, бидејќи тие средства се наоѓаат веќе во Град Скопје на посебна наменска сметка, коишто ние согласно документацијата ќе ги повлечеме на посебна буџетска сметка на Министерството за култура“, вели Костадиновска-Стојчевска.

Во јули годинава Советот на Град Скопје ја прифати иницијативата за времено предавање на ингеренциите за реконструкција на Универзална сала на Министерството за култура.