За новиот дом на џезерите обезбедени и средства за реновирање

Според Министерката за култура Бисера Костадиновска-Стојчевска проценетата вредност на реновирањето е околу 200 илјади евра (11,7 милиони денари), средства што ги обезбеди Министерството за култура во соработка со Кабинетот на заменик –претседателот на Владата задолжен за економски прашања, Фатмир Битиќи. Просторот е со површина од 475 квадратни метри и со проектот се предвидува уредување на простор за проби и за режија, мало студио, простор за чување инструменти и ноти, машки и женски гримиорни, тоалети и три канцелариски простории…

Откако Владата и Министерството за култура обезбедија трајна адреса и простор за работа на новата Национална установа „Оркестар за џез-музика“ (под Националната опера и балет), вчера беше објавено дека се обезбедени и средства за реновирање на овие простории. Според Министерката за култура Бисера Костадиновска-Стојчевска, проценетата вредност на реновирањето е околу 200 илјади евра (11,7 милиони денари), средства што ги обезбеди Министерството за култура во соработка со Кабинетот на заменик-претседателот на Владата задолжен за економски прашања, Фатмир Битиќи.

„Министерството за култура обезбеди изработка на Основен проект за реновирање и уредување на просторот и за санација на инсталациите на подрумските простории во зградата на Национална опера и балет. Просторот е со површина од 475 квадратни метри и со проектот се предвидува уредување на простор за проби и за режија, мало студио, простор за чување инструменти и ноти, машки и женски гримиорни, тоалети и три канцелариски простории. Проектот предвидува и простории за машинска опрема и електрични инсталации“, посочи Костадиновска-Стојчевска на вчерашната прес-конференција.

Таа истакна дека се исклучително задоволни со ова урбано решение. Со работата на Здружението на џез-музичари во овој круг на градот, се оживуваат стари спомени за Скопје, се заокружува музичкиот простор каде што се и Средното музичко училиште, Факултетот за музичка уметност, Националната опера и балет, Филхармонијата, како и живиот парк ‘Ибни Пајко’“.

„Со Оркестарот за џез-музика се комплетира и се збогатува ова музичко и уметничко опкружување, и со оглед на тоа што џезот е музика на слободни стилови, убедена сум дека постојаното присуство на џезерите овде ќе значи нов квалитет за културата, за социјалниот живот и за сликата на Скопје“, додаде Костадиновска-Стојчевска.

Според вицепремиерот Битиќи, новиот дом на џезерите, куќата на џезерите, доби од Владата 11,7 милиони денари, од кои десет милиони се средства од ТАВ програмата.

„Со ова создаваме модерен амбиент, каде што оркестарот ќе може непречено да создава џез-музика, со што Северна Македонија ќе ја поставиме на мапата на земји кои институционално го негуваат овој стил на музика“, кажа на прес-конференцијата Битиќи.

Инаку, Владата ја донесе одлуката за формирање на новата Национална установа „Оркестар за џез-музика“ во март годинава, а привремено беше сместен во просториите на зградата на Филхармонијата.

Филхармоничарите тогаш преку протести пред Министерството за култура го изразија своето незадоволство и загриженост дека не е можно две национални установи да функционираат под ист покрив без заемно да си пречат. (Д.Т.)