„Егзит“ номиниран за најдобар фестивал во светот

Познатиот британски магазин „Њу мјузикал експрес“ го номинира „Егзит“ за најдобар фестивал во светот, соопшти дирекцијата на познатиот музички фестивал од Нови Сад, Србија.

Британскиот магазин е еден од најугледните светски медиуми, со традиција долга 70 години, а покрива теми од областа на музиката, филмот и културата.

Наградите НМЕ што ги доделува магазинот се воспоставени една година по основањето на брендот, а во текот на историјата меѓу добитниците биле: Елвис Присли, Дејвид Боуви, Пол Велер, Клиф Ричард, „Артистик манкис“, „Мјус“, Мориси, „Оезис“, „Битлси… и многу други. Свеченото 69-то доделување на наградите ќе се случи на 2 март, во салата „О2 академи Брикстон“ во Лондон.

„Егзит“ досега двапати е прогласен за најдобар европски фестивал, како и за најдобар надвор од границите на Велика Британија. Голем број угледни светски медиуми, како „Гардијан“, „Њујорк тајмс“, Си-ен-ен, Би-би-си го вброиле фестивалот во најдобрите манифестации во светот.

А за 21-то издание на „Егзит“, кое ќе се одржи од 7 до 10 јуни годинава, на Петроварадинската тврдина во Нови Сад, првите потврдени „хедлајнери“ се Ник Кејв и неговите „Д бед сидс“, еден од најоригиналните и највлијателни бендови во светот, и Борис Брејча, миленикот на публиката во регионот, додека новите имиња ќе бидат соопштени наскоро.