Доделувањето на Еми наградите ќе се одложи поради штрајкот во Холивуд

Годинешното 75-то доделување на наградите Еми за најдобри телевизиски остварувања ќе биде одложено поради штрајкот на сценаристите и актерите во Холивуд, објавија американските медиуми.

Наградата, првично закажана за 18 септември, се очекува да биде преместена во јануари, објави Лос Анџелес Тајмс во четвртокот навечер.

Според магазинот Variety, сите вклучени во доделувањето на наградите Еми се известени за одложувањето на церемонијата, а наскоро се очекува и официјално соопштение.

Сепак, не е одреден нов датум за церемонијата, изјави за AFP извор близок до организаторите на доделувањето на наградите.

Холивудските актери и сценаристи моментално штрајкуваат, и тоа е прв штрајк во американската филмска индустрија по 63 години.

Доколку штрајкот продолжи, сите холивудски ѕвезди би можеле да ја бојкотираат церемонијата на наградите Еми, што би било катастрофално за телевизиската публика.

Сценаристите исто така не би можеле да пишуваат текстови или шеги за домаќините на церемонијата.

Телевизијата Фокс, која требаше да ја емитува церемонијата во САД, наводно побарала наградите да се одложат до јануари, што ќе даде повеќе време за решавање на спорот околу штрајкот.