„Дневна доза мазохизам“ вечер во МКЦ

Претставата „Дневна доза мазохизам“ од театарската група „Пресврт“ вечер ќе биде изведена во Младинскиот културен центар (МКЦ), во рамки на 46. издание на „Млад отворен театар“ (МОТ).

“Истражувајќи ја опсесијата како генетски код врз кој се создаваат односите меѓу луѓето и опседнатоста како пракса што се артикулира во секојдневието, новиот театарски проект на Пресврт, „Дневна доза мазохизам“ го разложува човековиот емотивен распад преку конфликтот што се наоѓа во обичните ситуации.

Заслепени од виртуелниот идеал, луѓето често се наоѓаат на крстопатот помеѓу тоа што е и тоа што посакуваат да биде, како што му се случува и на Тома, чие несовпаѓање со светот длабоко се истакнува преку неговата привлечност кон младата „инфлуенсерка“ Софија, која пак се бори со сопствениот наметнат калап на своите обожаватели”, соопштија од МКЦ.

Фестивалот „Млад отворен театар“ е поддржан од Град Скопје и Министерство за култура.