„Дизни“ може да остане без ексклузивните права на Мики Маус

„Дизни“ наскоро може да ги изгуби ексклузивните права на некои од своите омилени и препознатливи ликови, вклучувајќи го и Мики Маус, цртаниот лик познат како долгогодишна маскота на брендот. Анимираниот глушец првично беше создаден на 1 октомври 1928 година, а во 2024 година, речиси 95 години по неговото создавање, ќе влезе во јавна сопственост. Според американскиот закон за авторски права, 95 години е временскиот период во кој анонимно или псевдоанонимно тело добива заштита. Меѓутоа, постојат ограничувања што, сепак, ќе важат, и покрај истекувањето на авторските права.

– Можете да го искористите ликот на Мики Маус како што беше првично создаден за да создадете свои приказни или приказни за Мики Маус со овој лик. Но ако го направите тоа на начин што ќе ги натера луѓето да размислуваат за „Дизни“, што е многу веројатно затоа што тие инвестирале во овој лик толку долго, тогаш теоретски „Дизни“ би можел да каже дека сте ги прекршиле нивните авторски права – изјави за „Гардијан“ Даниел Маједа, заменик-директор на правната клиника за документарни филмови на Правниот факултет на Универзитетот во Калифорнија. Првото појавување на Мики Маус во црно-белиот цртан филм „Паробродот Вили“ беше пионер во употребата на синхронизиран звук во анимацијата, каде што музиката и звучните ефекти одговараа на движењата на екранот.

– Од првото појавување на Мики Маус, тој се трансформираше со текот на годините, но правата ќе бидат одземени само за првата итерација од 1928 година – објасни Маједа. Секако, „Дизни“ сè уште ќе ги задржи своите авторски права за сите идни варијации на филмот или уметничкото дело додека тие официјално не достигнат 95-годишна граница.