Дел Прато реагираше на гол линијата во 94. минута и го шокираше Мота (Видео)

30.10.2024 Oktomvri Sreda

Јувентус продолжи со променливите изданија во текот на натпревар кој трае 90 минути, па така по конфузното дерби со Интер кое заврши 4:4, денеска понуди трилер и против Парма.

Тимот на Тиаго Мота изгледа доста поранливо во одбрана по тешката повреда на стоперот Бремер, а тоа денеска знаеја како да го искористат играчите на Парма, кои од една страна беа блиску до победа, но и до пораз.

Гостите поведоа со голот на Дел Прато уште во 3-та минута и најавија дека ќе бидат жилав противник за фаворитот, нешто во што домаќините се уверија и по израмнувачкиот гол.

Погодкот на МекКени значеше дека Јувентус по секоја цена ќе ги нападне трите бода, но Парма имаше подготвено нов одговор, овојпат преку Сом за 1:2 пред полувремето.

Тимот на Тиаго Мота се реорганизираше и изгледаше многу подобро во вторите 45 минути, но откако израмни на 2:2 со голот на Веа, натпреварот на крајот влезе во една критична фаза во која висеше голот на двете страни.

Парма не ја искористи својата најдобра шанса за 2:3 преку Шарпентие, додека Јувентус имаше стопроцентна шанса во 94-та минута, кога ударот на Јилдиз од гол линијата го расчисти херојот на натпреварот, десниот бек Дел Прато.