Деби Хари се потсети на патувањето на „Блонди“ во Куба

15.07.2021 Juli Cetvrtok

„Блонди“, најуспешниот бенд што се појави на њујоршката панк/њувејв музичка сцена во 70-тите, имаа шест хитови број еден во Велика Британија, вклучувајќи ги Heart Of Glass и Atomic, а продаде 40 милиони плочи ширум светот. По шест години турнеи низ светот, се распаднаа во 1982 година, откако на гитаристот Крис Стејн му беше дијагностицирана речиси фатална болест на кожата. Вокалистката Деби Хари започна парт-тајм соло кариера додека помагаше во неговото закрепнување. Деби и Крис, кои во тоа време беа пар, се соочија и со голем финансиски проблем. Тие мораа да платат огромна сума за неплатен данок како резултат на лошо управување и ја изгубија својата куќа. Даночната управа дури и одзеде дел од облеката на Деби за да го надомести долгот. Двајцата ја умртвија болката, емотивна и физичка, со хероин. Со години идејата за повторно обединување на „Блонди“ изгледаше невозможна – но Деби секогаш беше борец. Кога Крис закрепна во 90-тите години и предложи повторно оживување на „Блонди“, Деби се согласи само под еден услов. „Имав барање“, се присетува таа. „Реков, не сакам да бидам во стариот бенд. Единствениот начин на кој би го сторила тоа е ако сме креативни. Повеќе претпочитав да гледам во иднината отколку да гледам во минатото, така што тоа беше еден од основните принципи што сметав дека мора да го имаме”. Со ваквата челична решителност, Деби го претвори враќањето на „Блонди“ од епилог во витално ново поглавје. Синглот Maria отиде директно на број еден во 1999 година, и тие продолжија да прават хитови – Good Boys, Long Time – удобно сместени покрај класиците како Rapture и Picture This на нивната сет-листа. Пред две години тие постигнаа уште една долгогодишна амбиција со две специјални свирки во Хавана, Куба. Долго време фасцинирани од музиката и архитектурата на Куба, бендот ја искористи шансата да го посети островот како дел од официјалната културна размена. Во краток филм што ги документира концертите, пејачката прави паралели помеѓу Хавана и Њујорк, градот каде што го направи своето име.