Готово е: Гвардиола го добива првото елитно засилување од редовите на Челси

Матео Ковачиќ на првиот собир со хрватската фудбалска репрезентација воочи Лигата на нации самиот соопшти дека дошло време за разделба со Челси, клуб кој за неговото заминување ќе инкасира 30 милиони фунти.

Оваа вест попладнево ја пренесоа сите познати англиски медиуми, а угледниот „Би-Би-Си“ излезе со детали и открива дека Челси ги договорил сите детали со Манчестер Сити.

Новиот европски шампион од прв момент беше во пол-позиција за ангажманот на фантастичниот хрватски играч за врска, кој без размислување дал зелено светло да се приклучи на тимот кој го тренира Пеп Гвардиола.

„Би-Би-Си“ открива дека Сити првично ќе плати 25 милиони фунти за реализација на трансферот, но Челси со сигурност ќе добие уште 5 милиони фунти во вид на бонуси.

Овој трансфер сигурно ќе изврши дополнителен притисок врз Илкај Гундоган кој размислува дали да остане во Сити, а од друга страна, Челси продолжува со ослободувањата на места во тимот, откако претходно се откажа и од Нголо Канте.