Во сончевата Гевгелија по 20. пат се одржа ликовната колонија „Аполонија 2024“

12.07.2024 juli Petok

Со завршната изложба на ликовните дела на 11 ликовни уметници од Македонија, Грција, Србија и Турција, завчеравечер на терасата на хотел „Аполонија“- Гевгелија, означен е крајот на традиционалната 20. по ред Ликовна колонија „Аполонија 2024“.

Во изминатите десеттина дена уметниците Ниче Василев, Гоце Божурски, Драги Хаџи-Николов, Мирјана Крстева-Массетти, Бојан Савиќ, Ѓорѓе Станиќ, Иван Гроздановски, Ифигенија Васдари, Зивер Каплан, како и гостинката Оливера Аџиќ и фотографот Рајко Р Каришиќ, создадоа дела кои ќе ја збогатат ризницата на сликите кои продолжуваат да го  живеат својот живот во просториите на хотелот „Аополонија, а Гевгеличани уште еднаш беа сведоци на ненадминливиот дел од Убавината на Творештвото.

Директорот на Фондацијата Аце Ристовски изјави дека уметниците, и оваа година,  изработуваа дела  по сопствен избор, инспирирани од гевгелиското поднебје,

„Гледајќи како од длабочините на белилото, врамено во сликарското платно, полека се раѓа потполно нов, сјаен свет на боите, на фантазијата, на магијата на човековиот допир, допирот на уметникот-творец, преку сликите на овогодишната Ликовна колонија се враќаме на чистотата на надежта што секогаш тлее во нас“

Величината на Творечкиот дух, присутните на изложбата , повторно ја доживееја во питомата и сончева Гевгелија, за која познатиот гевгелиски поет  Илија Карајанов ќе напише: „Сликарот кон Изворот се упатува, сончевата страна е отворена за бестрашни летови“. (Љ.А.)