„Во Лига Европа бевме апсолутно беспрекорни од првиот момент“

ФУДБАЛ – УНАИ ЕМЕРИ

Унаи Емери ги пофали своите фудбалери за нивната посветеност откако го освои првиот голем трофеј на Вилјареал, победувајќи го Манчестер јунајтед во финалето од Лига Европа во средата, со возбудлива серија пенали од 11-10, по нерешениот резултат 1-1 по 120 минути игра. Тоа беше рекорден четврти триумф во Лига Европа за Емери како тренер, откако трипати го освои тоа натпреварување со Севилја. – Во Лига Европа бевме апсолутно беспрекорни од првиот момент. Неколку дена доаѓавме во 6 часот наутро на стадионот за да подготвиме натпревар за недела. Зборувавме за уживање во овие моменти. На крајот, горди сте што го освоивте трофејот, но ако не победите, тажни сте. Победата е уште еден чекор, важен чекор напред. Ние работиме за овие моменти. Можевме да им дадеме радост на многу луѓе – рече Емери, пренесе британски „Гардијан“.

Емери му се приклучи на Вилјaреал во јули 2020 година, девет месеци откако замина од Арсенал. Шпанецот го исфрли својот поранешен клуб сезонава во полуфиналето, пред да победи уште клуб од англиската Премиер-лига во финалето, но рече дека не го гледа ова достигнување како личен триумф, пишува „Гардијан“. – Инсистирам дека тоа воопшто не е спортска одмазда. Се обидувам да уживам во секој момент, победувајќи и губејќи. Се обидувам да создадам нови околности, па секаде каде што сум бил, дури и во Англија во Арсенал, научив многу, запознав многу луѓе, други култури и фудбал. На крајот од таа приказна се појави професионална фрустрација, но тогаш се отворија некои други врати. Да се победи денес е задоволство, но за мојот клуб денес, како што беше кога бев во Севилја. Кога бев во Арсенал, игравме финале во Лига Европа и не можевме да победиме, но тоа е процес; од таа игра научив многу за да ја освојам оваа можеби – рече Емери, пренесе „Гардијан“.