Во вселената ќе се гради ново филмско студио

Компанијата „Спејс ентертејмент ентерпрајс“ (СЕЕ), која стои зад најавениот филм на Том Круз што ќе се снима во вселената, најави уште еден голем проект – изградба на цело филмско студио во вселената.

Во најавите за изградба на овој вселенски комплекс наречен СЕЕ-1, како краен рок се наведува декември 2024 година, а овој модул ќе има два конкретни дела – филмски и спортски. Филмскиот дел ќе овозможи развој, продукција, снимање и пренос на различни видови видеосодржини и сето тоа во ниската орбита на Земјата, во средина со микрогравитација. Таму треба да се одржуваат и филмски, телевизиски, музички и спортски настани.

СЕЕ има намера да произведе своја содржина во овој модул, но и да им ја изнајми на други заинтересирани уметници, продуценти и креативци од различни области. Компанијата „Аксиом спејс“, претходно ангажирана на Меѓународната вселенска станица, ќе биде задолжена за изградба на комплексот. Модулот СЕЕ-1 ќе биде поврзан со нивниот дел од станицата, наречен Аксиом стејшн. Целиот овој дел ќе биде одвоен од станицата во 2028 година.

Идејата зад овој проект е човечката раса и целата креативна индустрија да се движат во нова насока и да ја користат вселенската средина на начин што досега не бил тестиран. Тоа е нешто за што луѓето долго сонуваат и треба да поттикне дополнителна креативност и иновација, пишува „Вераети“.