Винисис Жуниор: Овој тим на Реал ќе биде подобар за три години

Винисис Жуниор од сезона во сезона игра се позначајна улога во шпанскиот великан Реал Мадрид каде најдобро се снајде откако на клупата седна искусниот Карло Анчелоти.

„Кралевите“ имаат уште неколку играчи кои горе-доле се на иста возвраст со Бразилецот кој верува дека овој состав ќе биде подобар за три-четири години.

-Каде се гледам за пет години? Во Мадрид. Сигурен сум дека можам да продолжам да играм овде уште долго. Исто како и другите млади кои сега се со нас: Камавинга, Родриго, Феде, Чуамени, Милитао… сега имаме многу добар тим и ќе биде многу подобар за три до четири години, -порача офанзивецот кој со ова како да ја потцени улогата на Модриќ, Крос и Бензема, играчи кои сега се столбови, ама тешко дека е бидат тука за четири години што значи ќе мора да се најдат соодветни замени што дефинитивно нема да биде лесна мисија.

Воедно офанзивецот посочи што кај него е променето во споредба од времето кога пристигна на „Бернабеу“.

-Мислам во многу аспекти, особено поради мојата возраст. Пристигнав кога имав 18 години, штотуку почнав да играм во првиот тим на Бразил и пристигнав овде во најголемиот клуб во светот каде е тешко да се игра, и со овие навивачи… но како што одминуваше времето, секој ден се подобрував и сега сум најдобрата верзија од себе. Се надевам дека нема да застанам тука и ќе продолжам да се развивам за да правам големи работи, -заклучи Вини за „Гол“.