Вил Смит јавно му се извини на Крис Рок за шлаканицата

29.03.2022 Mart Vtornik

Актерот Вил Смит, годинешниот добитник на Оскар за филмот „Кралот Ричард“, јавно му се извини на комичарот Крис Рок за шлаканицата што му ја удри на сцената за време на доделувањето на престижните филмски награди.

„Би сакал јавно да ти се извинам тебе, Крис, претерав и згрешив“, изјави Вил Смит, кој својот колега Крис Рок го удри откако тој се пошегува на сметка на неговата сопруга Џејда Пинкет Смит.

Набргу потоа, Смит го доби првиот Оскар во кариерата играјќи го таткото на тениските легенди Венера и Серена Вилијамс во „King Richard“.

„Насилството во сите негови форми е отровно и деструктивно. Моето однесување на синоќешното доделување на Оскарите беше неприфатливо и неоправдано. Шегите на моја сметка се дел од работата, но шегата за здравствената состојба на Џејда беше премногу за да ја поднесам и реагирав емотивно“, напиша Смит во изјавата објавена на Инстаграм.

Претходно филмската академија на Оскарите го осуди Смит поради инцидентот и најави формална истрага за случајот, но и дека ќе размислат за понатамошни дејствија што би можеле да ги преземат во ваков случај.

Комичарот Крис Рок, пак, одби да поднесе пријава во полиција, а беше објавено I дека по шлаканицата од својот колега се пошегувал зад сцената:

„Ова е единствениот пат кога те удира Мухамед Али и не остава гребнатинка“, мислејќи на улогата на Вил Смит во биографскиот филм за познатиот боксер.