(Видео) My Sweet Lord на Џорџ Харисон доби видео за 50-годишнината на хитот

17.12.2021 Dekemvri Petok

По 50 години, My Sweet Lord на Џорџ Харисон конечно го доби своето прво официјално видео. Познати личности, вклучително и колегата од „Битлси“, Ринго Стар, се здружија за да му оддадат почит на Харисон во првото официјално музичко видео за неговата класика од 1970 година. Харисон, кој почина во 2001 година, ја издаде песната од албумот All Things Must Pass како негов прв соло сингл по распадот на „Битлси“и се најде на топ-листите ширум светот. Песната го рефлектираше истражувањето на Харисон на источните духовни концепти и другите религии. Видеото, објавено во средата, е хумореска во која актерот од „Војна на ѕвездите“ Марк Хамил глуми шеф на тајната служба која испраќа двајца специјални агенти – Фред Армисен и Ванеса Баер од Saturday Night Live – на метафизичка мисија „да се бара она што не може да се види“, се наведува во соопштението за печатот на веб-страницата на Харисон. Во видеото се појавуваат повеќе од 40 музичари, актери и комичари, кои се испраќаат како специјални агенти и други ликови. „Пристапот беше визуелно да се претстави песната додека овие агенти и инспектори постојано го пропуштаа метафизичкото чудо околу нив“, напиша Ленс Бенгс, кој го режираше видеото.