Велешани повторно добија кино: Почна со работа „Киноверзум 3Д“ во Велес

По цели седумнаесет и пол години, велешани повторно добија кино. Со филмот „Аватар: Патот на водата“, во салата „Бели мугри“ во Велес започна да работи киното „Kиноверзум 3Д“ од Свети Николе. За најмладата публика, пак, беше прикажан детскиот филм „Неверојатниот Морис“. Филмовите репризно ќе бидат прикажани и в сабота и недела. „Киноверзум ЗД“ Велес на својата страница го има објавено и репертоарот за една недела.

Инаку, поранешното Градско кино „11 Октомври“ во Велес беше затворено во август 2005 година. Сега, велешани секој четврток ќе имаат премиера со најновите светски филмски хитови.

Новото Градско кино во Велес со најсовремена дигитална опрема, според највисоките светски стандарди, со инвестиција на Општина Велес од 76.430 евра, сместено во салата „Бели мугри“ на локалната библиотека, беше отворено на 11 октомври 2020 година. Тогаш, таа вечер, премиерно беше прикажан домашниот филм „Стела“ со две проекции, по што киното беше затворено две години и три месеци. По бројните барања и реакции на велешките љубители на киното тоа да биде ставено во функција, локалната власт одлучи да го издаде на управување преку јавен повик. На три години користење, салата „Бели мугри“ сместена во локалната библиотека, каде што е новото кино, ја доби „Киноверзум 3Д“ од Свети Николе.