Буфон посочи кои играчи биле клучни за Милан за освојување на Скудетото

Милан по пауза од единаесет години повторно стана италијански шампион, титула која беше потврдена во последното коло со убедливата победа над Сасуоло од 3-0.

Ова за „росонерите“ е 19. Скудето кое треба да биде најава дека славниот гигант се враќа на старите победнички патеки и дека ќе може да игра значајна улога како во Италија така и во Европа. Секако пред нив престои доста работа, клучни ќе бидат финансиите, па останува да видиме како ќе биде во иднина, меѓутоа она што е јасно е дека пехарот се врати на „Сан Сиро“.

Славниот Џанлуиџи Буфон во доста наврати се има радувано на овој пехар, па од свој агол направи кратка анализа, даде коментар за тоа кои играчи според него се најзаслужни за радоста во Милано.

-Мајк Мењан-врвен голман: трите најважни столбови за успехот на Милан беа Мењан, Тео Ернандез и Тонали, а кога беше на располагање и Златан Ибрахимовиќ, -рече Буфон кој потоа беше запрашан за Рафаел Леао.

-Исто и тој се разбира, макар и малку понеконзистентно. Ова покажува што значи да се верува заедно, да се има компактна група и менаџер кој може да ве стимулира до вистинската точка и да создаде позитивна атмосфера, -порача легендарниот Џиџи.