Бах: ЛОИ одлично илустрираа како ИОК преку спортот придонесува за целите за одржлив развој на ОН

25.09.2024 Septemvri Sreda

На Самитот за иднината, кој се одржа во седиштето на Обединетите нации (ОН) во Њујорк, претседателот на Интернационалниот олимписки комитет (ИОК), Томас Бах, изрази благодарност до светските лидери што го вклучија спортот во новоусвоениот Пакт за иднината, кој беше усвоен од сите 193 земји членки на Обединетите нации.

– Прифатете ги моите искрени честитки за усвојувањето на Пактот за иднината. Особено би сакал да ви се заблагодарам што ја препознавте улогата на спортот како важен овозможувач и забрзувач за постигнување на целите за одржлив развој на Обединетите нации. Неодамнешните Летни олимписки игри во Париз на одличен начин илустрираат како ИОК придонесува за целите за одржлив развој преку спортот. Подготвени сме да го продолжиме и зајакнеме овој придонес на спортот во рамките на Пактот за иднината, затоа што овој пакт совршено го одразува нашето олимписко мото „Побрзо, повисоко, посилно, заедно“ – рече претседателот на ИОК за време на пленарната седница на ОН, пренесе ИОК на својата интернет-страница.

Спортот се споменува и во Декларацијата за идните генерации, која е дел од Пактот за иднината. Во овој документ, земјите членки на ОН се обврзуваат да „инвестираат во достапно, безбедно, инклузивно и рамноправно квалитетно образование за сите, вклучувајќи и физичко образование и спорт, и да промовираат можности за доживотно учење, техничка и стручна обука и дигитална писменост, овозможувајќи меѓугенерациско стекнување и трансфер на знаења и вештини за унапредување на перспективите на идните генерации“.

Вклучувањето на спортот во Пактот за иднината е уште една пресвртница во работата на ИОК со Обединетите нации, со која ИОК има статус на постојан набљудувач. Во 2015 година, во историски момент за спортот и Олимпиското движење, спортот беше официјално признаен од Обединетите нации како „важен овозможувач“ на одржливиот развој и беше вклучен во „Агендата 2030“ на ОН, пишува ИОК.

– ИОК го смета мирот како најосновен за одржлив развој на општеството. Затоа сме многу среќни и горди што, и покрај сите геополитички тензии, успеавме да ги собереме спортистите од сите 206 национални олимписки комитети и олимпискиот тим на бегалци во Париз. Пред ЛОИ спортистите се здружија во моќен повик за мир. За време на ЛОИ тие жестоко се натпреваруваа еден против друг. Во исто време, тие живееја мирно заедно под еден покрив во олимпиското село. Тие ги споделија своите оброци, нивното искуство и нивните емоции. Тие меѓусебно се почитуваа, без никакви инциденти или дискриминации, дури и ако нивните држави се во војна. Со сето тоа, спортистите создадоа култура на мир, покажувајќи ни каков би бил нашиот свет кога сите би живееле во олимпискиот дух на мирен соживот – рече, меѓу другото, Бах во својот говор во седиштето на ОН, пренесе ИОК. Г.И.