Баерн ќе заработува речиси двојно повеќе од спонзорскиот договор за името на стадионот

Германскиот шампион Баерн Минхен традиционално заработува сериозни пари од спонзорските договори, а добрите резултати и правилните чекори на менаџментот се потврдени и со најавеното дополнително освежување за буџетот.

„Билд“ тврди дека Баварците постигнале договор со „Алијанц“ за продолжување на договорот со кој стадионот на Баерн е именуван по компанијата и истиот ќе трае до 2033 година.

Она што е поважно е дека годишно клубот ќе добива по 13 милиони евра, наместо 8 милиони кои му следуваа според актуелниот договор кој истекува.

За договорениот период Баерн ќе добие 130 милиони евра, што сигурно ќе има дополнително позитивно влијание на финансиската слика на бундеслигашот.