Арсенал доби ново засилување, Артета задоволен: Тој ќе ни донесе сила и квалитет

Лидерот во англиската Премиер лигата, тимот на Арсенал официјализираше уште едно засилување во овој преоден рок по Леандро Тросар кој дојде од редовите на Брајтон.

„Топчиите“ овој пат добија дополнителна опција во одбраната и тоа во полскиот репрезентативец, Јакуб Кивиор. Се работи за играч кој има 22 години, висок е 189 сантиметри, а во Англија доаѓа од италијанскиот прволигаш Специја кој за овој трансфер ќе заработи 25 милиони евра.

-Прекрасно е што ни се придружува Јакуб. Тој е млад разновиден дефанзивец кој покажа огромен потенцијал и квалитети со Специја во Серија А, а исто така и на меѓународно ниво со Полска. Јакуб е играч кој ќе ни даде сила и квалитет на нашата одбранбена единица. Му посакуваме добредојде на Јакуб и неговото семејство во Арсенал и со нетрпение очекуваме да работиме со него, -порача менаџерот Микел Артета.

Договорот е со важност до 2028 година.