Анчелоти застана во одбрана на Винисиус Жуниор: Тој заслужува поголема почит

Реал Мадрид го положи тешкиот тест на гостувањето кај Атлетик Билбао во Баскија (2-0) и со тоа продолжи да одржува чекор со Барселона во трката за пехарот во Примера.

Ова беше дуел кој беше решен со погодоците на Карим Бензема и Тони Крос, но воедно и дуел во кој повторно во фокусот беше Винисиус Жуниор. Тој одново имаше дуело со противничките играчи, ги лутеше домашните навивачи, заработи и жолт картон по што тренерот Карло Анчелоти се реши да го извади од игра да не се случи некоја глупост.

Токму Италијанецот застана во одбрана на бразилскиот ас кој често знае да влезе во клинч со противничките фудбалери и да создаде непотребна нервоза на теренот.

-Му реков [Винисиус] да ја игра неговата игра. Тој пред се е одличен играч, ама е многу чувствителен … сите го туркаат. Противниците го удираат, противничките навивачи, понекогаш и судиите. Доби жолт картон против Билбао, ама многу го удираа.

-Мора да запомниме дека е многу млад и е под притисок од сите. Понекогаш можеби го губи фокусот, но тој е многу млад. Го сакам. Сакаме тој да биде почитуван од сите малку повеќе, -порача Анчелоти.