Анчелоти за незадоволната ѕвезда во Реал: Мора да ја чека својата шанса

21.09.2021 Septemvri Vtornik

По драматичната дерби победа на „Месталја“, Реал Мадрид утре на домашен терен ја пречекува Мајорка, средба пред која Карло Анчелоти најави дека Едуардо Камавинга најверојатно првпат ќе добие шанса во стартната постава.

Младиот Французин на три натпревари влегуваше од клупа и направи евидентна разлика на теренот, но покрај тоа што издвои пофални зборови за Камавинга, искуснииот Карло говореше и за незадоволниот Марко Асенсио.

Медиумите блиски до клубот вчера пренесоа дека поранешниот шпански репрезентативец е разочаран од фактот што не е ниту во втор план кај тренерот Анчелоти, кој сега побара трпение од фудбалерот кој никако не ја пронајде вистинската форма по тешката операција на коленото.

– Сите играчи знаат што мислам, тешко е да се состави почетен тим. Знам дека не може да биде среќен и тоа е нормално за него во овој момент.

– Ненормално ќе беше да биде среќен без да игра на теренот. Но, не станува збор само за Асенсио, тука се и Иско и Јовиќ. Асенсио тренира добро и тоа е она што ми се допаѓа. Секој ќе ја дочека својата шанса, Јовиќ и Иско добија по десет минути против Валенсија и направија разлика на теренот за нас. Ја променија динамиката на мечот, – изјави Анчелоти.