Алкалоид доби австриски ривал во 3. рунда на ЕХФ Купот

29.10.2024 Oktomvri Vtornik

Алкалоид одигра два извонредни натпревари против Драгунас Клаипеда и се пласираше во третото коло на ЕХФ Купот, натпреварување за кое денеска беше извлечена нова ждрепка.

Освојувачот на македонскиот Куп влезе како еден од тимовите кои не се носители во извлекувањето, а судбината посака Алкалоид да добие австриски ривал во третата фаза.

Алкалоид ќе одигра двомеч против тимот на Вест Виена, со тоа што нашиот претставник повторно првиот меч ќе го одигра пред своја публика.

Воведниот меч од оваа фаза ќе се одигра на 23-ти или 24-ти ноември во Скопје, додека реваншите се закажани за една недела подоцна.

Доколку Алкалоид ја мине оваа рунда, тимот од Автокоманда ќе се пласира во осминафиналето на ЕХФ Купот, што ќе значи дека момците на Кирил Лазаров ќе презимат во Европа.