Алиоски: Исланѓаните дојдоа да ни ја уништат забавата, но…..

14.11.2021 Noemvri Nedela

Езџан Алиоски постигна фантастичен гол вечерва во Скопје и ја најави историската ноќ на стадионот „Тодор Проески“, на кој Исланд потпадна под притисокот и загуби со 3:1.

Оваа победа беше клучна за нас во квалификациите и го обезбедивме второто место во групата, по што си обезбедивме историско место во бараж за едно Светско првенство.

Македонија ќе го дознае својот полуфинален противник на 26-ти ноември, но пред да се случи тоа, фудбалерите и стручниот штаб можат да уживаат во тоа што го остварија и во овие квалификации.

Алиоски се покажа како најдобар играч за Македонија во двата натпревари со Исланд, бидејќи покрај голот вечерва, стрелаше и имаше асистенција на гостински терен во натпреварот кој заврши 2:2. Поради тоа, исландскиот медиум „mbl.is“ му направил кратко интервју на нашиот дефанзивец по денешниот меч, кој порачал дека тој и соиграчите не дозволиле да им се уништи забавата за која зборуваа исландскиот селектор и фудбалерите.

– Постигнав гол и имав асистенција во Исланд, но тоа беше тежок натпервар и успеаја да ни израмнат. Вистина е, Исланд ни помогна бидејќи ремизираше со Романија, но денеска покажавме дека сме подобри од нив. Исландскиот тим има добри млади момчиња кои сакаа да ни ја уништат забавата, но не беше можно да ја уништат оваа прослава. Ние ја заслуживме оваа победа, – изјавил Алиоски.